البلد هي الأردن يا جماعة. محدش يفتح اللينك عشان حركات ال click baits دي تتعمل في أخبار الفنانين والأفلام أو حتى الموضة والأكل لكن في الأخبار المتعلقة بالصحة والوباء ده اسمه رخص.
الحوار ده فكرني بمرة كنت رايحة الكلية وكالعادة التحرش اللفظي كان جزء من الفقرة الصباحية اليومية، المهم أن الشخص اللي كان بيتحرش بيا لفظيًا يوميَا -واللي حرفيًا ما اعرفش شكله عشان كنت باتعمد ما التفتلوش- قرر إنه زهق من تجاهلي فراح رامي حاجة على بنطلوني اكتشفت انها مية نار لما روحت
طالما عمرك ما اختبرت ال panic attacks وال anxiety attacks يبقى من احمد ربنا وما تسألش إزاي ممكن حد يوقف شغله / ينسحب من مسابقة / يتنازل عن منصب عشان يحافظ على صحته العقلية.
كإنسانة عندها anxiety disorder فأنا متفهمة تمامًا يعني إيه سيمون بيل وناعومي أوساكا ينسحبوا من الأولمبيات
لو شايف إن ضرب الأطفال عادي عشان إنت انضربت وإنت صغير وطلعت سليم أهوه فأحب أقولك إنك عشان شايف إن ضرب طفل شيء عادي ده في حد ذاته أكبر دليل إنك ما طلعتش سليم ولا سوي نفسيًا ولا حاجة 🤷🏻♀️
مفيش حد عاقل سوي يشوف إن الإيذاء الجسدي لشخص أصغر وأضعف منه لا يملك الدفاع عن نفسه شيء عادي.
اللبس الفاضح حرية والتحرش جريمة بالظبط زي ما ان واحدة تنزل من البيت لابسة كل مجوهراتها ودهبها حرية ولو حد جه ثبتها وسرقها دي جريمة.. وزي ما واحد بينزل من بيته بعياله حرية ولو حد خطف منهم عيل تبقى جريمة.
سهلة أهي والله بس إنت اللي مش عارف تبرر إزاي إنك وسخ فبتلزقها في البنت.
حوار الاستقلال المادي ده بيبقى لطيف لحد ما تكتشف إنك ممكن يطلع عين أمك عشان تجيب حاجات بديهية غيرك أهله بيجيبوهاله زي السلامو عليكو كده.
بس الواحد يرجع ويقول اللي بتجيبه بتعبك وشقاك طعمه بيبقى مختلف وقيمته غير.
٣ قرايبي لسه متجوزين أجانب، واحدة سورية وواحدة من المغرب والثالثة من السعودية.. البنات ما جابوش في الجوازات دي غير شنطة هدومهم بس.. الولاد جابوا كل حاجة من أول الشقة للرفايع بتاعت البيت بس المصرية هي الوحشة سبحان الله مع إنها بتجهز النص بالنص وما نادرا اما بتاخد مهر أصلًا
@M7rusa
لا فعلا المصريات طلباتهم فوق طاقة الشباب واسرهم
شقة تمليك وعفش لازم الاوضه بمذا زى بنت خالتها وبنت عمتها وشبكه بكذا علشان الناس وفرح علشان اهلنا تفرح
الاجنبيه من غير كل ده
ومع ذلك انا اتمنى ابنى يتجوز مصريه وربنا يعينا
ده شغل ناس مالاقيتش وظايف فقررت تفتح باب رزق تاكل منه لقمة في ظل الغلاء اللي احنا فيه.
كل البيوت دي في مصيبة دلوقتي مش بس عشان اضطروا يسيبوا بضائعهم، ده كمان عشان هما عادة بياخدوا جزء من فلوسها مقدم من العملا بتاعتهم عشان يعملوا الأوردر وبالتالي مطلوب منهم يرجعوها دلوقتي
اوردرات شي ان كلها اتفتحت ف مينا سفاجا والكراتين اتقطعت وطلعت من الاكياس وهتتباع بالكيلو لبتوع البالة لان اصحاب البضاعة تم فرض جمارك عالية عليها فاصحابها سابوها
يبقى الراجل من دول ما بيركعهاش إلا من الجمعة للجمعة، ويوم الخميس بيشقط واحدة ينام معاها، وبيدفع رشوة عشان العسكري ما ياخدهوش مخالفة، ويسرق نت جاره، وما بيطلعش قرش زكاة على فلوسه، وبيسب الدين لمدرب فريق الكورة بتاعه كل ماتش، بس بييجي لحد الورث والحجاب ويكفر أي حد يتكلم عنهم 😂😂
عمري ما هنسى شكل بنطلوني الإسود الواسع اللي رجله دابت في لحظة وباحمد ربنا مليون مرة إني طلعت من الموقف سليمة ومن يومها وبقيت بخلي اللي موصلني سواء تاكسي أو حد من أهلي يدخلني لحد بوابة الكلية.
ماهو إنتم لو بتمشوا في الشارع خايفين تلاقوا فجأة صوابع بتلعب في بنطلوناتكم أو كف بيهبش في صدركم ولو فتحتوا بقكم مليون واحد يغلطكم هتعرفوا معنى الكسرة والقهرة وثورة الغضب اللي البنات والستات حاسيين بيهم دلوقتي.
البلد دي لو فيها سنة ضمير وشوية دين وكرامة كنّا شفنا حساب وعقاب حقيقي.
عارفين إيه الأقذر من المتحرشين؟
لا مش الرجالة اللي بتبرر التحرش للأسف.. الأقذر هم الستات والبنات اللي بتبرر التحرش وبتهاجم البنت اللي من جنسها لأي سبب (عشان صورت المتحرش - عشان قررت ترد عليه - عشان بلّغت - عشان لبسها - عشان خارجة.. الخ).
أنا فلاحة من الزقازيق يا جماعة.. عشت ٢٠ سنة من حياتي بره مصر ولما رجعت -بكامل إرادتي- قررت أعيش في الزقازيق بردو.
لما حد بيقول عليا فلاحة فصدقوني ما باخدهاش على إنها إهانة إطلاقاً! ده واقع 😀
زي بالظبط لما حد يقول عليا إني بنت أو إني رفيعة أو إني بيضا مثلا .. كل دي حقائق علمية 😅
يا جماعة اللي يخبط أي حيوان ياريت يعني ينزل يشوفه لو مات يحطه على جنب ولو اتعور يوديه أقرب عيادة بيطرية أو يبلغ بمكانه.. حرام يعني نسيبه يتألم لحد ما يموت أو تيجي عربية تانية تقضي عليه.. اقسم بالله هتتحاسبوا عليهم يوم القيامة زيهم زي لو خبطتوا عيل وسبتوه ومشيتوا.
مش قادرة أتخيل حياتي كانت هتبقى رديئة قد إيه لو مكنتش باشتغل وباصرف على نفسي
فكرة أنك تبقى معتمد كليًا ومستني كل حاجة من حد حتى لو الحد ده أقرب الناس ليك شيء مهين وحقير للغاية.
مفيش إنسان سوي فالدنيا ممكن يخطر على باله فكرة مريضة زي فكرة أن الستات ما تشتغل غير لو فاشل وخايف منهم
أنا واحدة تعودت تعمل إللي هي عايزاه بكل بساطة، مستقلة ماديًا، سيدة قرار نفسي، وعادة لما بسأل حد عن حاجة بسأله من باب الاستشارة مش الإذن.. مش متخيلة أبدًا نفسي في علاقة أتخلى فيها عن ده كله وأرجع "استأذن" و "اطلب" و "استسمح" قبل ما آخد أي خطوة 🤷🏻♀️ كام راجل يرضى بده في مجتمعنا؟ قلة.
الذكر اللي بيمنع مراته تشتغل أو تتعلم أو حتى تخرج من البيت عشان ما بيقدرش يستحمل فكرة الاختلاط وبيطين عيشتها لو سلمت بالإيد على راجل من قرايبها بجد مش قادر يتخيل الست مرهفة الأحاسيس ممكن تشعر بإيه وجوزها بينام مع واحدة تانية وبيديها مشاعر ووقت من وراها أو بعلمها.
الفيديو عندنا في الزقازيق حيث ماينفعش حد يطلب أكل وما نديلوش! وما ينفعش حد يزورك وما ياكلش أو ياخد معاه أكل وهو مروح.
سح السنين أول ما شوفت الشوارع والمحلات اللي اعرفها ومشيت فيها 😭♥️
تقريبا المجتمع المصري مش هيفوق من وهم "لبس البنت هو سبب التحرش" إلا لما يصحى يوم على فيديو اغتصاب سبعينية منتقبة من قبل أولاد قُصّر وهي بتصلي التراويح في العشر الأواخر من رمضان مثلا عشان ما يبقاش فيه أي حجة ممكن يتحججوا بيها ويعلقوا التحرش عليها.
عايزة أستقيل وأغير الكرير وأشوف بوي فريند مز بيحب الحيوانات ونقضي اللي باقي من عمرنا في أي بلد جوها حلو طول السنة بنتصور واحنا عالشط بالمايوهات بنجري ورب كلبنا وماسكين في أيدينا جوزهند طالع منه شاليموه واحنا شعرنا كيرلي وجميل وعاملين تان.
أنا بصوم من وأنا عندي ٦ سنوات -بكامل إرادتي- ومن يومها ولحد النهاردة عمري ما حياتي ما تأثرت لو شوفت حد بياكل أو يشرب قدامي حتى لو كنت هموت من الجوع والعطش!
ماعرفش إزاي ممكن شخص بالغ عاقل يقول إن اللي بياكل قدّامه بيستفزه والله.
اللي بيعمل حاجة خالصة لوجه الله مفيش شيء يهزه.
سوري لتدمير المنشور يا جماعة بس الصيام مش صحي ولا حاجة ده عبادة فيها مشقة بتعملها للتقرب من الله.. زي ما الحج كده مش هايكنج وماونتن كلايمبنج ورياضة! ده بردو مشقة وتعب بتعمله عشان تقرب من ربنا. فبلاش ندور على مخارج علمية وطبية وصحية في أي عبادة عشان نثبت بالعلم إن الدين صحيح.
بعد سنين من الشغل والكتابة في الفاشون والشوبنج جالي عرض شغل أونلاين من حد شاف ملبس خان ومواضيعي اللي كانت بتنزل في المصري الْيَوْم وسوبر ماما وغيرهم عن الموضة والستايل.. ولما عرفوا إني من الزقازيق اترددوا وفركشوا الموضوع عشان يعني إزاي ابقى من الفلاحين وبافهم في اللبس وكده 😂
لولا العيبة كنت عملت منشن لكل العيال النص لبة اللي هنا وسافروا وهاجروا وشغالين وعايشين برا عادي لمجرد أنهم مجتهدين بس مش أكتر.
كفاية إحباط في الناس! اللي عنده فرصة ياكل عيش في أي مكان يروح يا جماعة رب هنا هو رب هناك وأنت مش شجرة ورزقك هيجيلك فين ما تروح لو سعيت له
قمة الانحطاط والله إنك تكون شغال في مكان وتسرب ورقه لأي حد، والأدهى بقى إنك تسرب الورق ده للسوشال ميديا وفيه بيانات خاصة وعناوين مفصلة لشخصية عامة سهل جدًا أي مريض أو مجرم يوصلها ويؤذيها.
أما بالنسبة بقى لتسريب أي مبالغ مالية حد دفعها في أي حاجة فدي بقى رخص ودناوة وسفالة.
أنا بقيت باخد مرتبي وأقسمه على ٤ وكل أول أسبوع أطلع ربعه وأبدأ أصرف منه وبمجرد ما الفلوس تخلص بترزع في البيت زي الشطار لحد أول الأسبوع اللي بعديه.
النتيجة إن المرتب ٧٥٪ من الوقت بقى بيكفي الشهر كله وأحيانا باعرف أحوش منه كمان بعد ما كان بيخلص في أول أسبوع.
لازم يكون فيه حل لموضوع غلاء السلع الأساسية ده!
في دبي حاليا فيه ٢٠٠ سلعة أساسية في كارفور سعرهم ممنوع يرتفع عشان الناس تعرف تعيش بالحد الأدنى من الغذاء المتوازن
المواطنين الشرفاء بيردوا على فيديوهات المطار وهو غرقان بصور من اليابان وبيقولوا "ماهي بتحصل في أحسن الدول أهي" 🙄
حد يقولهم إن اللي في اليابان ده إعصار والبلد تم إخلاءها مش شوية مطرة!
هنفضل ندافع عن الإهمال لحد إمتى ونسميه وطنية؟
لسة عارفة خبر وفاة زوج واحدة صاحبتنا.. سايب وراه زوجة و٣ بنات أكبرهم ٧ سنين 💔
الكارثة بقى إنه مديون وزوجته ما بتشتغلش.. ربنا يتولاهم ويعين عيليتها على الحمل ده.
عمل المرأة ضرورة مش رفاهية ولا منظرة ولا اختلاط مالوش داعي.. كل ست لازم يكون ليها مصدر دخل مستقل تقدر تعيل بيه عيلتها.
لا حول ولا قوة إلا بالله.. دعاء فاكرة نفسها أحسن من أسماء وبتشهر بصورها وبتر��هن إنها مش هتعرف تقرا الفاتحة وشايفة انها كده بتدافع عن الشعراوي والدين.
فعلا الناس بقت ما تعرفش من الدين غير القشور.. هي دي التركة العفنة اللي مش هنخلص منها للإسف أبدًا.. ده اللي خدناه من تعطيل العقل.
كفاية جربعة بقى يا مصر!
يعني محدش مقتنع بالحظر وبتنزلوا تختلطوا وتتلاحموا ولا هاممكم وتصلوا جماعة في الشارع وتروحوا تستخبوا في محلات مقفولة عشان تشيشوا وتلعبوا دورين طاولة بدل قعدة البيت ولما دكتورة تموت بسبب فيروس الكورونا اللي جالها وهي بتعالجكم منه ترفضوا تدفنوها!!!!
ده صغير مستحيل يعمل كده.
ده متجوز مستحيل يعمل كده.
ده دكتور مستحيل يعمل كده.
ده شيخ جامع مستحيل يعمل كده.
ده فنان مشهور والبنات بتترمي تحت رجليه مستحيل يعمل كده.
شهادات الناس والقضايا اللي بنسمع عنها واللي بنشوفه بعنينا يثبتلنا بكل أريحية أن أبوك شخصيًا ممكن يعمل كده وانت متعرفش
جماعة كلمة كده على جنب.. مفيش حاجة أحقر من إنك تشتم في بلدك عشان خاطر أي حد تاني.
تلقائيًا بتسقط من نظر كل الناس وأولهم الناس اللي بتحاول تجاملهم بالشتيمة دي.
الكلام ده باقولهولكم بأمانة وبعد سنين كتير قوي في الغربة والتعامل مع ناس من كافة فئات المجتمع.
محدش هيحترمك كده صدقني
أسباب اترفضت بسببها في قعدات جوازات الصالونات اللي أساسًا كنت باحضرها بالعافية:
-رفيعة.
-مش حلوة.
-مش بتاعت جواز (عشان قولت إني بحب الشغل والسفر)
-كبيرة (عشان كنت كسرت ال ٢٥)
والحاجات دي كانت بتيجي من الطرف التاني قبل أهله 😀
الواحد ثقته في نفسه بتتهز وبعد كده بيجيله تبلد. اثبتي
آخر علاقة كنت فيها انتهت بسبب إن بشرتي سمراء، وأهله كانوا عاوزينه يتجوز واحدة بيضاء..
بغض النظر عن كون ربنا أنقذني، بس من ساعتها وأنا ثقتي في نفسي مهزوزة جداً، ومش شايفة إني جميلة زي ما كنت بشوفني زمان!
ليه ممكن حد يعمل في بني آدم تاني عمره ما آذاه كده!
ماعرفش الناس اللي بتشتمني هنا بإني فلاحة متوقعين مني إيه بصراحة 😀 أيوة أنا فلاحة يا جماعة والله.. مش صعيدية ولا اسكندرانية ولا نوبية ولا قاهرية! أهلي من الدلتا وأعتقد في مرحلة ما كان عندي أجداد بيشتغلوا في زراعة الأرض لأننا ورثنا أراضي زراعية فإيه المشكلة اللي بتعايروني بيها؟
مش هيتقفل غير لما المصريين كلهم يعملوا حملة report لحساب
@mbcmasr
عشان يوصلوا بكل هدوء مدى استيائهم من محتوى القناة الموجه واختلافه التام عن محتوى قناة MBC الخليجية
شفت بعيني تدابير ربنا وهي بترتب كل تفصيلة في حياتي وبتخلق من أصعب اللحظات فرص عمر بتجسد بشكل حي آية "إن مع العسر يسرا".. ربنا يتم نعمته علينا ويرزقنا الصبر والرضا حتى يظهر اليقين.
الإكس المتجوز عمل شير معايا لفايل وورد على دروب بوكس وكاتبلي فيه "ياريت نتواصل هنا عشان دي أأمن طريقة" محدش يقدر يقفشها والمفروض بقى ندخل نكتب لبعض فالفايل وننعش العلاقة من جديد😂
المهم إن العلاقة اصلا انتهت عشان خاني معاها وبعدها اتجوزها وجاي دلوقتي بيعكس الآية.
ديل الكلب فعلا😀
لو مش ناوي تأمن مستقبل عيالك ( بأنك تشبعهم حب وحنان أو تستثمر في تعليمهم أو تخططلم حياتهم أو تأمنهم ماديًا أو جميع ما سبق) يبقى ما تخلفهمش عشان هما مش لعبة ولا تتينة تقفل بيها بق المجتمع لما يقولك عايزين نشوف خلفتك.
طيب عشان البنت اتهرت تريقة حرفيًا من ناس مش قادرة تفهم معنى التويتة.. القاهرة على قد ما هي خرا في موضوع التحرش لكنها فعلا لا تقارن بالأقاليم في نسبة التسامح مع لبس البنات.. فيه مناطق في الشرقية مثلا لو فكرت تلبس فيها بنطلون سكيني أو تيشيرت نص كم قصير شوية هتتهان جامد بدون تعاطف
تصميم الأزياء والتركيز على اللون الأزرق بالذات فيها حاجة عظمة تستاهل التقدير والإعجاب.. ياريت مدام مونيا بتاعت مسلسل "الملك" تكون قاعدة بتتفرج معانا وفي إيدها كوباية زرنيخ.
أيًا كان جنسك.. لو ما بتعرفش تأكّل وتشرّب نفسك ولا تنظف المكان اللي إنت عايش فيه ولا تغسل الهدوم اللي بتوسخها والأطباق اللي بتاكل فيها يبقى إنت شخص غير بالغ ولا تصلح أساسًا للزواج حتى لو كنت مرتاح ماديًا وناوي تجيب خدم وحشم.
دي مهارات يومية عادية زي القراءة والكتابة وتعدية الشارع
كنت هذا الشخص لحد ما شعري كله وقع وجالي anxiety disorder ونخالة وردية في جلدي.. النتيجة إن اقنعت نفسي أن محدش بياخد معاه التايتل ولا الفلوس ولا النجاح في قبره 😀 بقيت باشتغل عشان اعرف اتفسح واتبسط وزي ما تيجي تيجي بقى.
العمر واحد والصحة واحدة
-لو عندك قميص/فستان أبيض شفاف البسي تحته حاجة بيج مش بيضا
-حاول ما تغسلش الجينز قدر الأمكان ولو مضطر اغسله مقلوب.. الأحسن بدل الغسل لو مش متوسخ ببقع تحطه بس في الفريزر طول الليل
-حطي مانيكور شفاف على إكسسواراتك مش هتصدي
-البس بنطلون وبلوزة او قميص كلهم نفس اللون لو عايز تبان أطول
الناس اللي عمالة تتريق على محمد ثروت عشان رجع يغني وتقول جدو ومش جدو أحب بس أقولهم إن ثروت قد منير بالظبط والاتنين أكبر من عمرو دياب ب ٧ سنين بس فاهدوا كده وروقوا وسيبونا نستمتع بحلاوة صوته.
طب ما الأولى بقى نمنع الزواج التاني عشان الدنيا غلا والمفروض الراجل يصرف على بيت واحد مش ٢.
كمان نقلل الخلفة وكفاية عيلين بس عشان نعرف نصرف عليهم.
وياريت الراجل اللي بيورث ضعف اخته يبدأ بتحمل مسؤليتها المادية عشان الغلاء بقى على الكل دلوقتي.
الدنيا مش شبكة ونيش ومهر وبس يا هشام
ملاحظة إن فيه قنوات كتير جدًا على اليوتيوب محتواها رائع لكن مظلومة في الانتشار.. اللي يعرف قناة مفيدة تستحق المتابعة يعمل منشن باللينك بتاعها مع شرح بسيط لنشاطها تحت التويتة دي وأنا هاعمل ريتويت عشان اللي عندي يشوفوها ويستفيدوا منها.
كوريا الجنوبية حاربت موضوع مشاكل النمو وعزوف الأطفال عن شرب الحليب بإنها عملت حليب بالفراولة والموز والشيكولاته بسعر بسيط عشان حتى الفقراء يقدروا يشتروه
وأنا في واحدة من المصالح الحكومية نادتني الموظفة بعد أن يعني هزرت معاها شوية عشان أكسر روتين اليوم وبقينا أصحاب خلاص عشان تقولي خلي بالك الموظفة اللي هناك دي عندها كورونا واحنا ساكتين عشان هتطلع معاش فسيبينها تخلص مدتها فمتقربيش قوي منها وهي بتختملك.
الشيف شربيني بيوترني جدًا وهو بيطبخ.. ايده منغير جوانتي يمسك بيها الفراخ النية ومنها يمسك المعلقة وبعد كده يفتح التلاجة ويمسح في هدومة وبعدين يلف سندوتشات وبعدها يذوق حاجة بصوابعه وأكاد والله اسمع صوت السالمونيلا وهي بتضحك ضحكات شريرة متقطعة وهي بتنتشر في اللوكيشن كله وهتنط علينا
عشان كده معظم اللي وصلوا سني وما اتجوزوش بقوا شايفين إن الزواج مش هيضيف ليهم حاجة قوي -غير لو نفسهم في طفل- وبالتالي بيتأنوا جدًا قبل أخذ الخطوة وما بيرضوش بأي حاجة ولا بيقدموا تنازلات عشان الدنيا تمشي على حساب نفسهم.
عمرو أديب مستضيف فسخاني يتكلم عن الفسيخ ودكتور عشان يتكلم عن مخاطر الفسيخ.. المهم يعني long story short الدكتور حاليًا قاعد غطسان في سندوتش فسيخ وبيقرقض في بصلة خضرا والفسخاني بيحضرله سندوتش بطارخ.
يا جدعان أنا عندي صاحبة منتقبة بتلبس عباية شبه الوطواط كده وبيشة وجوانتي وكوتشي كله اسود في اسود واكتر جملة كانت بتسمعها في حياتها في الشارع كانت “أكيد تحت العباية حكاية”! انتم هتمثلوا ولا ايه؟
والله يا جماعة لو عملتوا إيه مستحيل تقنعوني مثلا إن من حق الراجل يقول لمراته ما تخرجيش لما تكون هي عايزة تخرج فقط من باب إن أنا الراجل وكلمتي هي اللي تمشي 🤷🏻♀️😀
ده أنا أعرف ستات ما تقدرش تقص شعرها غير لما تستأذن جوزها عشان ما ينكدش عليها عمرها وأنتم تقولولي ده اسمه حب؟ حب في عينكم
لسة جايالي دعوة لطيفة جدًا بتقول (ربنا يتمم أمورك على أهون سبب).. قد إيه حاجات بتبوظ على أسباب تافهة وبتخلينا نمشي نكلم نفسنا! فياسلام بقى لو حاجة هنموت عليها وبسبب حاجة تافهة الدنيا مشيت وكملت!
ربنا يتمم أمورنا وإياكم على أهون سبب 🤲🏻
كنت قاعدة في شقة في دبي قدام الجامع مباشرة والموضوع ده كان مضايقني جدًا ومستحيل أقبل بيه في مصر لأن الأصوات العالية من المايكروفون بتتعبني جدًا بس مكنش فيه بديل.. مع أول أذان لاقيت نفسي مبهورة بعذوبة وهدوء صوت المؤذن وبقيت بافتح الشباك عشان اسمعه طوال اقامتي.
مؤذنين مصر بشعين.
بمناسبة الآذان في مصر اللي فعلا فيه مشكلة في صوت المؤذنين ونوع الميكروفونات والموضوع مضايقني جدا .. الأذان سبب للسلام النفسي مش العكس .. لدرجة انه من اسباب حبي ل ماليزيا واني كنت عايز اكمل هناك
لو دخلنا في سكة الإثباتات العلمية هنزعل ونجيب ناس تزعل.
عباداتك دي شعائر دينية بتعلمها ابتغاء مرضاة الله دون البحث عن أسباب فرضها.. إنت بتعملها عشان بتحب ربنا وعايز ترضيه وبس.
وربنا نفسه قالك لو تعبان أو مسافر افطر أو اقصر الصلاة ولو مش قادر عالحج ما تروحهوش وهكذا.. فنهدا كده.
المهم أساسًا بقى إن أسماء شريف منير كتبت البوست رغبة منها في إنها تفهم أكتر وتتعلم الدين وبتدور على مصدر يساعدها فالله أكبر يعني شعب مصر كله اداها من المنقي خيار ما يكفي لأنها تخرج من الملة بكل أريحية والله 😅
أمي أستاذة ورئيسة قسم في تضييع حقوقها والتنازل عنها بكل طيب خاطر أو عشان محرجة.. ده خلاني أستاذة في الدفاع المستميت عن حق كل الناس.
النتيجة:
كل الناس بتحب ماما وما بيطيقونيش في الأرض.
هل ده هيخليني أتغير؟ كلا البتة.. ده بيخليني أشرس وأعنف والله ونفسي أطول في استرجاع الحقوق 🤷🏻♀️
ساعة الميراث كله بيفتكر للذكر مثل حظ الأنثيين.. بس وقت الجد مفيش كلب بيطلع من جيبه جنيه يجوز اخته ولا يعالج أمه ولا يصرف حتى عليهم الا من رحم ربي... كله بيقولك بيتي وعيالي أولى 😂
خدوا ضعفنا بس افتكروا اننا ملزمين منكم اكل وشرب ولبس وجهاز وسكن وعلاج لحد ما نتجوز او نموت 🤷🏻♀️
اللي هيقول #شيرين إنسانة طيبة وبتتكلم بحسن نية واللي في قلبها على لسانها ومعلش دي غلبانة هاهزقه قبل ما اعمله بلوك.. شيرين ست لفت ودارت طالعة من الحواري وعارفة كويس هي بتقول إيه ودور المغفلة ده مش لايق عليها ولازم تتحاسب عشان كل ما بتفتح بقها بتخبط في حد شكل ولازم عقاب عشان تقفله.
يشهد الله إني ماشوفتش في حياتي حد وسخ في الخصومة قد الناس "المتدينين" بتوع أخي في الله وأختي في الله دول.. هم دول اللي ربنا قال عليهم "منافقين" فعلًا والدليل فجرهم بعد أي خصومة.
نفسيات جحيم وحقد رهيب من جوا والله العظيم.
نصيحة للشباب اللي مش معاه فلوس يسافر/يهاجر، أو معندوش خبرة للسفر، أو مش عايز يسيب أهله، أو مش قادر يبعد عن مصر:
اشتغل في شركات بره مصر remotely من بيتك فين ما تكون واكسب خبرة واعمل فلوس وبعدين ربنا يفرجها.
كورونا خلت معظم الشركات تشتغل عن بعد وده فتح باب رزق ضخم للكل.
عشان تفهموا شوية احنا زعلانين ليه إن مايكل كورس اشترى ڤيرساتشي خلونا نحطها بشكل تاني:
تخيلوا صحيتوا لاقيتوا پايليس اشترى أديداس.
أو إيتش آند إم اشترت يو إس پولو.
مفيش حد اتضرب وطلع سليم.
إنت يا إما اتضربت والموضوع أثر فيك نفسيًا بشكل كبير لدرجة خلتك ما تقدرش تعمل ده في حد تاني وتعيشه نفس الألم والإهانة.
أو إنك اتضربت والموضوع ولّد جواك حقد وخلل نفسي خلاك أول ما بقيت إنت الطرف الأقوى استحليت اللي كنت بتستنكره وبقيت شايفه عادي.
فنانين مصر المثقفين وهما بيسخروا من خلقة ربنا عشان سمعوا كلمتين معجبوهمش من فنانة زميلة ما غلطتش في شكل أي حد وكان ممكن يترد عليها بمليون رد شيك يحرجها ويخليها تعتذر.
من يومين ياسمين صبري تستهين بمتلازمة داون والنهاردة عسيلي بيسخر من شعر ونبرة صوت زميلة.
أنا افهم مثلا السلع الاستفزازية دي تبقى مثلا يعني الشنط والجزم والهدوم اللي من ماركات عالمية زي LV و Chanel.. الكحوليات بما اننا بلد مسلم وكده يعني.. الساعات اللي سعرها معدي ال ١٠٠ ألف.. كرسي المساج.. قمصان النوم اللي بتنور في الضلمة وبتقول بابا وماما.. لكن جبنة وقهوة وسشوار!
يعني الست الشرع محللها راجل واحد حزين يتيم ولما تفكر تطلب الطلاق عشان مقصر معاها في شيء أساسي زي ده تلاقي “الافتاء” بتلف وتدور وتكتب موضوع طوييييييل بيتكلم عن إنها المفروض تصبر وتسامح عشان دي علاقة مودة ورحمة..لكن الراجل اللي عادي يتجوز ٤ لو واحدة منهن عطلت بيقولوه بدلها في ثانية
تويتر فيه مشكلة رهيبة وهي إنك لما بتبطل تتويت لفترة من الزمن بتفقد مهارة التويتنج وبتلاقي الموضوع بقى صعب ومعادش سلس زي الأول وبتحتاج بقى تكارك بكام تويتة عرة كده لحد ما المكنة تدور وتطلع قماش.
ربنا خلقنا درجات وله في ذلك حكم.. لو مستكتر على واحدة عربية ب ١٠ مليون جنيه غيرك مستكتر عليك ال ٥٠٠ جنيه اللي شاري بيهم موبايلك و ال ١٠٠ جنيه اللي بتدفعهم اشتراك للنت اللي انت داخل عليه تتكلم عن "الفقر والفقرا"!
ومعلش يعني لو مش المليونيرات اللي هيركبوا رولز رويس عايز مين يركبها؟