يامعشر السنة التأسيسية بجامعة الامام او الجامعات الأخرى،
اعرف شعور التوتر والخوف والتعب النفسي والجهد اللي مو متعودين تسوونه بالثانوي قبل ، هذا غير اللي قاعد ينقص درجات او مو عارف شلون يذاكر او اللي للحين يهوجس وش يتخصص او حتى اذا تخصصه مناسب له او لا
كل هذي التساؤلات بتلقون اجوبتها مع الايام ومابتجي نهايه السنه على خير الا وانتو عارفين اذا وجهتكم صحيحة بالنسبة لطلبة تأسيسي الطب اللي عندنا او وش التخصصات اللي ودكم فيها بالنسبه لبقية تحضيري الصحي في مختلف الجامعات. هذي مرحلة جديده من عمركم عطوها شعورها ووقتها
لا تتوقعون انكم بتتأقلمون مع الضغط والتوتر من اول اسبوع ، الموضوع يبيله وقت وتشوفون ايش طريقه المذاكره المناسبه لكم ووش الطريقه اللي تنكبكم وتخليكم تنقصون وتعرفون وين المكان ومتى الوقت اللي تكونون مركزين مره بالمذاكرة ، عطوا انفسكم راحتها في التعبير عن طريقه المذاكره المناسبه
بالاضافة بتكلم عن دكاترتنا المستقبليين اللي خايفين من موضوع هل منجد بيروح كل وقتي اذاكر واراقب السلايدات وانتظر الاختبار القادم ، عن تجربه واقعيه بدون اضافه ايجابيه ومجاملات ، مقدر طبعا اتكلم عن السنوات الاكلينيكيه بالاخير ماجربتها لكن ك اول سنه بالسنوات الاساسيه
يتبع..
اشوف الموضوع منجد تنظيم وقت وادري هالجملة استهلكوها الكثير بس تراها منجد واقعيه ، يعني شخص يركز بمحاضراته الصبح يرجع البيت العصر يقراها خلاص باقي يومه يعيشه زي مايبيه ، فيه ناس بالويكند يحفظون وما شاء الله عليهم يرتاحون اكثر وفيه ناس لا لكن بشكل عام لما يجي اختبار
اكيددد انك بتقعد بالبيت وماتطلع الا للضرورة ويكون اغلب وقتك دراسه شي طبيعي جدا واعتقد بكل تخصص كذا لكن يمكن بالطب تزيد عدد الايام شوي بسبب كثرة المحاضرات والمعلومات ، لنفترض فيه ميد بعد اسبوعين لماده دسمه وصعبه طبيعي بتبدا من الان تقسم وماتطلع لين تنجز بينما لو ماده سهله
بتقل ايام المذاكره مستحيل تذاكر اسبوعين لها ف الموضوع نسبه وتناسب انت تحدد وش السهل ووش الصعب. غير الاختبارات انا من رأيي الشخصي الموضوع تنظيم وقت بشكل كبير يعني اذا بتقرا محاضراتك بشكل يومي وتركز مع شرح المحاضرين وقت مذاكرتك للاختبار بيسهل عليك بشكل عجيب وبتخلص قبل حتى.